Frå Hollywood til Bollywood

Fotograf: Chris Young | Leverandør: Ap/Scanpix | CC (by nc sa)

Bollywood-filmane er kjende for spektakulære dansenummer. Her opptrer stjerna Bipasha Basu under ein filmfestival i Canada.

Seks millionar tilsette produserer tusen filmar i året. Dei omset for åtte–ti milliardar dollar. Vi snakkar ikkje om Hollywood, men Bollywood.

Det største filmproduserande landet i verda er faktisk ikkje lenger USA, men har sidan midten av 1970-åra vore India.

Bollywood er blitt ei nemning ikkje berre på sentrum for filmproduksjon i India, Mumbai (tidlegare kalla Bombay), men for ein eigen filmsjanger. Bollywoodfilmane er ofte overdådige kjærleikshistorier prega av fargerike kostyme og kulisser og talrike innslag av musikk og dans. Som ei følgje av det multikulturelle samfunnet, har dei fått aukande popularitet også i Vesten.

Fotograf: Punit Paranjpe | Leverandør: Reuters/Scanpix | CC (by nc sa)

Den britiske suksessfilmen «Slumdog Millionaire» frå 2008 hadde fleire Bollywoodfilmar blant inspirasjonskjeldene sine.

Etter at det er blitt mogleg å kjøpe film på DVD og på nettet, har filmar frå andre land lettare kunna konkurrere med amerikanske filmar. Den kinesiske kampfilmen «Snikende tiger, skjult drage» blei valdsamt populær i USA og Europa i 2000. Eksempel på andre ikkje-amerikanske suksessar er franske «Amélie» og indiske «Slumdog Millionaire».

Enkelte filmar blir no spelte inn på fleire språk slik at dei lettare kan konkurrere på den internasjonale marknaden. Quentin Tarantino laga filmen «Inglourious Basterds» (jo, det blir faktisk stava sånn!) på både tysk, fransk og engelsk.